ދިވެހިރާއްޖޭގެ ޒަކާތު ހައުސްގެ އިދާރާ ޤާއިމުކުރުމަށް ހުޅުމާލެއިން ބިމެއް ހަމަޖެހިފައިވާކަމަށާއި، ބިން މިލްކު ކުރުމަށް އިދާރީ ގޮތުން ކުރަން ޖެހޭ މަސައްކަތްތައް މިހާރު ފަށައިގެން ކުރިއަށް ގެންދަވާ ކަމަށް އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ޒަކާތު ހައުސްގެ ބޭސްފަރުވާގެ އެހީއަށް އެދޭ ޚިދުމަތް ވަންގަވްއަށް ތަޢާރަފު ކުރުމަށް ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ޒަކާތު ހައުސްގެ އިދާރާ ހުޅުމާލޭގައި ޤާއިމުކުރުމުގެ މަސައްކަތް 2025 ވަނަ އަހަރު ފެށިގެންދާނެކަމަށް އުއްމީދު ކުރައްވާކަމަށާއި، 2025 ވަނަ އަހަރު ވެގެންދާނީ ޒަކާތު ހައުސްއަށް ފާގަތި އަހަރަކަށް ވެސް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، ރާއްޖޭގެ ޒަކާތު ހައުސް ވެގެން ދާނީ ކުރިއަށް އޮތް ތަނުގައި މުހިންމު ޤައުމީ އިދާރާއަކަށް ކަމަށާއި، އިސްލާމީ ދުނިޔޭގައި ފާހަގަކޮށްލެވޭ މުހިންމު މުއައްސަސާއަކަށް ޒަކާތު ހައުސް ވެގެންދާނެކަމަށެވެ.
ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ޒަކާތުގެ ނިޒާމު ހަރުދަނާކުރުމުގެ މަސައްކަތުގެ ތެރެއިން 'ދިވެހިރާއްޖޭގެ ޒަކާތު ހައުސް' އިފްތިތާޙުކޮށްދެއްވީ 28 ޑިސެމްބަރު 2024 ގައެވެ. އޭގެ ފަހުން ޒަކާތުގެ މަސައްކަތްތައް ހަރުދަނާ ކުރުމަށް ގިނަ މަސައްކަތްތައް ދަނީ ކުރަމުންނެވެ. އޭގެ އިތުރަށް ޢާއްމުން ޒަކާތަށް ހޭލުންތެރިކުރުވުމަށް ޒަކާތު ހައުސްއިން އަންނަނީ މަސައްކަތްތަކެއް ކުރަމުންނެވެ.
