ދިވެހިރާއްޖޭގެ ޒަކާތު ހައުސްއިން ނޭޝަނަލް ސޯޝަލް ޕްރޮޓެކްޝަން އޭޖެންސީއާ ބައްދަލުކުރައްވައިފި
ދިވެހިރައްޔިތުންގެ ތެރެއިން ފުދުންތެރިކަން ނެތް ފަރާތްތަކަށް ބޭސްފަރުވާކުރުމަށް ދިވެހިރާއްޖޭގެ ޒަކާތު ހައުސްއިން ދޭ، އެހީ ދިނުމުގެ އިޖުރާއަތުތައް އަވަސް އަދި ފަސޭހަކޮށް ފޯރުކޮށްދިނުމާ ގުޅޭގޮތުން މަޝްވަރާކުރުމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އާ ބައްދަލުކުރައްވައިފިއެވެ.
މިބައްދަލުވުން ބާއްވާފައިވަނީ އެންސްޕާގެ ޖަލްސާކުރާ މާލަމުގައި އެވެ.
ބައްދަލުކުރުމުގައި ދެ އިދާރާއިން ގުޅިގެން ކުރެވިދާނެ ކަންކަމާއި ބެހޭގޮތުން ފުޅާ ދާއިރާއެއްގައި ވަނީ މަޝްވަރާކޮށްފައެވެ.
އެގޮތުން ޚިދުމަތަށް އެދޭފަރާތްތަކަށް ވީހާވެސް ފަސޭހަ އަދި އަވަސް ގޮތަކަށް ޚިދުމަތަށް އެދެވޭނެ އިންތިޒާމް ހަމަޖެއްސުމާއި، ހުށަހެޅޭ ފޯމުތައް އަވަހަށް ޕްރޮސެސް ކުރެވޭނެ ގޮތްތައް ހޯދުމާއި އަދި ދެ އިދާރާގެ ދެމެދުގައި މަޢުލޫމާތު ބަދަލުކުރުމާ ގުޅޭގޮތުން މަޝްވަރާ ކުރެވުނެވެ.
ޒަކާތު ހައުސްއިންދޭ ޚިދުމަތްތަކުގެ ތެރެއިން ބޭސްފަރުވާ ކުރުމަށް ދެވޭ އެހީ އަކީ ދައުލަތުގެ އެހެން އިދާރާތަކުން އެހީ ނުލިބޭ ޙާލަތުގައި ނުވަތަ ލިބުނު އެހީއަކުން ބޭސްފަރުވާ ކުރުމަށް ނުފުދޭ ޙާލަތްތަކުގައި އެފަރާތްތަކަށް އެހީތެރިވުމުގެ ގޮތުން ދެވޭ އެހީ އަކެވެ.
