އަގުވަޒަންކުރުމަށް ބޭއްވުނު ޚާއްސަ ރަސްމިއްޔާތުގައި ޒަކާތު ހައުސް އަށް ވަނީ ދެ އެވޯޑެއް ލިބިފައެވެ.
7 ޑިސެންބަރު ވީ ހޮނިހިރު ދުވަހުގެ ރޭ އިސްލާމީ މަރުކަޒުގެ ޖަލްސާ ކުރާ މާލަމުގައި ބޭއްވި މި ރަސްމިއްޔާތަކީ ވުޒާރާގެ މުވައްޒަފުންގެ ބުރަ މަސައްކަތް ފާހަގަކޮށް، ވުޒާރާއަށް ގިނަ ދުވަހު މަސައްކަތް ކޮށްދެއްވާފައިވާ މުވައްޒަފުންގެ އަގު ވަޒަންކުރުމަށް ބޭއްވި ރަސްމިއްޔާތެކެވެ.
މި ރަސްމިއްޔާތުގައި މިއަހަރު އެންމެ ހާޒިރީ ރަނގަޅު މުވައްޒަފުންނަށް އަގުވަޒަންކުރުމުގެ ގޮތުން ހަނދާނީ ލިޔުން ދީފައިވާއިރު، ވުޒާރާއަށް ގިނަ އަހަރުތަކެއް ވަންދެން ހިދުމަތް ކުރައްވާފައިވާ މުވައްޒަފުންގެ އަގު ވަޒަންކޮށް ހަނދާނީ ފިލާ ދީފައިވެއެވެ. އެގޮތުން ވުޒާރާއަށް 15 އަހަރާއި، 20 އަހަރު އަދި 25 އަހަރަށްވުރެ ގިނަ ދުވަހު ހިދުމަތްކޮށްދީފައިވާ މުވައްޒަފުންނަށް ވަނީ ހަނދާނީ ފިލާ ދީފައެވެ.
މީގެ އިތުރުން އިސްލާމީ ކަންތައްތަކާބެހޭ ވުޒާރާއާއި ވުޒާރާގެ ދަށުން ހިނގަމުންދާ އިދާރާތަކުން އެންމެ ރަނގަޅު މުވައްޒަފުން ހޮވާ ހަނދާނީ ފިލާ ދީފައިވާއިރު، ވުޒާރާގެ ސެކްޝަންތަކުގެ ތެރެއިން އެންމެ ރަނގަޅު ސެކްޝަންތަކާއި މަހާސިންތާތަކުގެ ތެރެއިން އެންމެ ރަނގަޅު މަހާސިންތާތަކަށްވެސް ވަނީ ހަނދާނީ ފިލާ ދީފައެވެ. އެގޮތުން ޒަކާތު ހައުސް އަށް ވަނީ "ބެސްޓް ކޮންފަރެންސް އެވާރޑް" އިންޓަރނޭޝަނަލް ޒަކާތު ކޮންފަރެންސް 2024، އަށް ލިބިފައެވެ. އަދި "ބެސްޓް ޓީމް" (ސިލްވަރ) ކޯރ ފަންގްޝަން ކެޓަގަރީން ޒަކާތު ހައުސް އަށް ވަނީ ލިބިފައެވެ.
މި ރަސްމިއްޔާތުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ދެއްކެވި ވާހަކަފުޅުގައި ވިދާޅުވީ، މިއަހަރުގެ ތެރޭގައި ވުޒާރާގެ އެކްޝަން ޕްލޭންގައި ޙާސިލްކުރަން ކަނޑައެޅި ކަންތައްތަކުގެ ތެރެއިން 98 އިންސައްތަ ޙާސިލްކުރެވިފައިވާކަމަށާއި، އިސްލާމީ ކަންތައްތަކާބެހޭ ވުޒާރާގެ ލަނޑުދަނޑިތައް ޙާސިލްކުރުމަށް ވުޒާރާގެ މުވައްޒަފުން ކުރައްވަމުން ގެންދަވާ މަސައްކަތްތަކަށް ޝުކުރު އަދާކުރައްވާކަމަށެވެ. އަދި ކުރިއަށް އޮތްތަނުގައިވެސް ވުޒާރާގެ މުވައްޒަފުންގެ ފަރާތުން ވުޒާރާގެ އަމާޒުތައް ޙާސިލްކުރުމަށް ފުރިހަމަ އެއްބާރުލުން ލިބިލައްވާނެކަން ޔަޤީން ކުރާކަމަށް ވަޒީރު ވިދާޅުވިއެވެ.
ރޭ ކުރިއަށްދިޔަ މި ރަސްމިއްޔާތުގައި އިސްލާމީ ކަންތައްތަކާބެހޭ ވުޒާރާއާއި، ވުޒާރާގެ ދަށުގައިވާ އިދާރާތަކުން ގިނަ މުވައްޒަފުން ބައިވެރިވެލައްވާފައިވާކަން ފާހަގަކޮށްލެވެއެވެ.
