ޒަކާތު ކައުންސިލްގެ 38 ޖަލްސާގައި ވަނީ ޒަކާތު ހައުސްގެ ކުރިއެރުމަށް ބޮޑެތި ކަންކަންތަކެއް ނިންމަވާފައެވެ.
ދިވެހިރާއްޖޭގެ ޒަކާތު ހައުސްއިން އެކުލަވައިލި، ޝަރީޢާ އެޑްވައިޒަރީ ކޮމިޓީން ފާސްކުރައްވާފައިވާ "ޒަކާތް ނެރުމާއި ބެހުމުގައި ޢަމަލުކުރާނެ ގޮތުގެ ޝަރުޢީ އަސާސުތަކާއި މިންގަނޑުތައް" ޒަކާތު ކައުންސިލުން އެންޑޯޒްކުރުމަށް މެންބަރުންގެ އިއްތިފާޤުން ވަނީ ނިންމަވާފައެވެ. އަދި އަސާސުތަކައި ޝަރުޢީ މިންގަނޑުތައް އެކުލެވޭ ފޮތެއް ޗާޕް ކޮށް އާންމުކުރުމަށް ވަނީ ފާސްކޮއްފައެވެ. މި އަސާސުތަކާއި މިންގަނޑުތަކަކީ ޒަކާތު ހައުސް އޭގެ މައްޗަށް ފަރުމާކުރެވިގެންދާނެ އަސާސުތަކާއި މިންގަނޑުތަކެވެ.
މީގެ އިތުރުން ޒަކާތު ކައުންސިލުން ނިންމި ދެވަނަ ނިންމުމެއްގެ ގޮތުން ދިވެހިރާއްޖޭގެ ޒަކާތު ހައުސްގެ ދާއިމީ އޮފީހުގެ އިމާރާތް ހުޅުމާލޭގައި ޤާއިމްކުރުމަށް ބޭނުންވާ ބިން ގަތުމަށް ފައިސާ ހަމަޖައްސާފައިވެއެވެ.
ޒަކާތު ކައުންސިލަކީ ޤާނޫނު ނަންބަރު 2006/3 (ދައުލަތުގެ މާލިއްޔަތުގެ ޤާނޫނު) ގެ ދަށުން އިސްލާމީކަންތައްތަކާ ބެހޭ ވުޒާރާއިން ޤާއިމުކޮށްފައިވާ ޒަކާތު ޓްރަސްޓް އެކައުންޓްގެ ޓްރަސްޓް ސްޓޭޓްމަންޓްގައިވާ ގޮތުގެމަތީން، ޒަކާތު ފަންޑު ހިންގާ ބެލެހެއްޓުމަށާއި، ފަންޑަށް ލިބޭ ޒަކާތުގެ ފައިސާ ޝަރުޢީ މިންގަނޑާ އެއްގޮތަށް ހޭދަކުރުމަށް ބޭނުންވާ އުސޫލުތައް ކަނޑައެޅުމަށާއި، ފަންޑުން އެހީތެރިކަން ފޯރުކޮށްދިނުމަށްޓަކައި، މިނިސްޓަރ ޢައްޔަންކުރާ ޒަކާތު ފަންޑު ކޮމިޓީ ގެ މަސައްކަތްތައް ކުރިއަށްގެންދާނެގޮތް ބަޔާންކޮށްދިނުމަށްޓަކައި އެކުލަވާލާފައިވާ އުސޫލުގެ ދަށުން ހިންގާ ކޮމެޓީއެކެވެ. މި ޓްރަސްޓް އެކައުންޓް ހިންގާ ބެލެހެއްޓުމަށްޓަކައި ސަރުކާރުގެ އެކި އިދާރާތައް ހިމެނޭގޮތުން ކޮމިޓީއެއް އުފައްދައި، ޓްރަސްޓްގައި ހުންނަ ފައިސާ ދީނީގޮތުން ކަނޑައެޅިފައިވާ ފަރާތްތަކަށާއި، އަދި މުޖްތަމަޢުގެ ލާބައާއި މަންފާއަށްޓަކައި ޒަކާތުން ޚަރަދުކުރުން ހުއްދަ ކަންކަމަށް، ޚަރަދުކުރާނެ ފައިސާގެ މިންވަރު ކަނޑައަޅައި، ޒަކާތު ފަންޑު ހިންގުމުގައި މިނިސްޓަރަށް އިރުޝާދާއި ލަފާ އެރުވުމަށް، އެކުލަވައިލެވިފައިވާ ކޮމެޓީއެކެވެ.
