މާލޭ ސިޓީގައި ކައުންޓަރުތަކުން ފިޠުރުޒަކާތް ބަލައިގަންނަން ފެށިގެން ކުރިއަށް ގެންދަންފަށައިފިއެވެ.
ކައުންޓަރުތައް ބެހެއްޓިފައިވަނީ އިސްލާމީ މަރުކަޒުގެ ޖަލްސާކުރާމާލަމުގައިއެވެ. އެގޮތުން 2 މާރިޗް 2025 ން 20 މާރިޗް 2025 ރަސްމީ ބަންދުނޫން ކޮންމެ ދުވަހަކު 9:30 ން 13:00 އަށް އަދި ރަމަޟާންމަހުގެ ފަހުދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވާފައިވާތީ، 23 މާރިޗު 2025 ން 30 މާރިޗު 2025 ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހަކު 11:00 ން 14:00 އަށް ކައުންޓަރުން ބަލައިގަތުމަށް ވަނީ ހަމަޖެހިފައެވެ.
އިސްލާމީ މަރުކަޒުގައި ގާއިމް ކުރެވިފައިވާ ކައުންޓަރުތައް ހާއްސަކުރެވިފައިވަނީ އުމުރުން ދުވަސްވެފައިވާ ފަރާތްތަކާއި، އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތްތަކަށް ޚާއްޞަކޮށްގެންނެވެ. މާލެ ސިޓީ ފިޔަވައިއެހެން ރަށްރަށުގައި ފިޠުރު ޒަކާތް ބަލައިގަތުމުގެ އިންތިޒާމް ހަމަޖައްސާނީ އެރަށެއްގެ ރަށު ކައުންސިލުންނާއި ސިޓީއެއްނަމަ ސިޓީ ކައުންސިލުންނެވެ.
އެހެން އަހަރު ތަކެކޭ އެއްފަދައިން މިއަހަރުވެސް 1 ރަމަޟާން 1446 ން ފެށިގެން ދިރާގާއި އުރީދޫ މެދުވެރިވެ ފިޠުރު ޒަކާތް ދެއްކޭނެ ގޮތް ވަނީ ހަމަޖައްސާފައެވެ. މީގެ އިތުރުން މޯލްޑިވްސް އިސްލާމިކް ބޭންކްއާއި ބެންކް އޮފް މޯލްޑިވްސް މެދުވެރިކޮށް 27 ރަމަޟާން 1446 ގެ 18:00 ޖަހަންދެން އޮންލައިންކޮށް ފިޠުރުޒަކާތް ދެއްކޭނެއެވެ. އަދި ރަމަޟާން މަހުގެ އެންމެ ފަހު ދުވަހުގެ 18:00 ޖަހަންދެން ބަނޑޭރި ޕޭ އަދި ފަހި ޕޭ އިން ޒަކާތް ދެއްކޭނެއެވެ.
ފިތުރު ޒަކާތުގެ ގޮތުގައި ނެރެންޖެހޭ ބާވަތްތަކާއި އަގުތައް:
– އާދައިގެ ހަނޑޫ: މީހަކަށް 12 ރުފިޔާ.
– ތައިލެންޑް ހުދު ހަނޑޫ: މީހަކަށް 62 ރުފިޔާ.
– ރަތް ހަނޑޫ: މީހަކަށް 86 ރުފިޔާ.
– އާދައިގެ ބާސްމަތީ ހަނޑޫ: މީހަކަށް 74 ރުފިޔާ.
– މޮޅު ބާސްމަތީ ހަނޑޫ: މީހަކަށް 100 ރުފިޔާ.
– އެންމެ މޮޅު ބާސްމަތީ ހަނޑޫ: 133 ރުފިޔާ.
– އާދައިގެ ފުށް: މީހަކަށް 10 ރުފިޔާ.
– އާޓާ ފުށް: 75 ރުފިޔާ.
ފިޠުރު ޒަކާތުގެ ގޮތުގައި ނެރޭނީ އަހަރު ތެރޭގައި އެރަށެއްގައި ބަނޑު ކެއުމުގެ ގޮތުގައި އާންމުކޮށް ކައިއުޅުނު ބާވަތަކުން 2.4 ކިލޯ އެވެ. ނުވަތަ ކިލޯއަށްވާ ފައިސާއެވެ.
