އަޅުގަނޑު ޙައްޖަށް ދިއުމަށް މޯލްޑިވްސް ޙައްޖު ކޯޕަރޭޝަނަށް ފައިސާ ދައްކާފައި ހުންނަތާ ހަނދުމަހުން އަހަރެއް ވެއްޖެއެވެ. އެފައިސާ ހުރީ އެތަނުގެ ބެލުމުގެ ދަށުގައި އެވެ. އެ ކޯޕަރޭޝަނުން އެފައިސާއިން އެއްވެސް މުޢާމަލާތެއް ކުރިކަމެއް ނޭނގެއެވެ. އަޅުގަނޑަށް ޙައްޖަށް ދެވޭނެ ކަމަށް އެބޭފުޅުން ލަފާ ކުރަނީ މީގެ 3 އަހަރުފަހުންނެވެ. މިޙާލަތުގައި އެފައިސާއިން ޒަކާތް ދައްކަން ޖެހޭނެ ހެއްޔެވެ؟ ޒަކާތް ދައްކަން ޖެހޭނަމަ، ދައްކަން ޖެހޭނީ އަޅުގަނޑުތޯ ނުވަތަ ޙައްޖު ކޯޕަރޭޝަނުންތޯ؟

އެފައިސާއިން ޒަކާތް ދައްކަން ޖެހޭނެއެވެ. ޒަކާތް ދައްކަން ޖެހޭނީ އެފައިސާގެ ވެރިފަރާތުންނެވެ. މޯލްޑިވްސް ޙައްޖު ކޯޕަރޭޝަނުގައި އެފައިސާ ބެހެއްޓިފައިވަނީ، ދިވެހިރާއްޖެއަށް ލިބޭ ޙައްޖު ކޯޓާތަކުގެ ތެރެއިން ކޯޓާއެއް ހޯދުމަށް ފަސޭހައަކަށްޓަކައި އެވެ. ތިޔަ ފަރާތުން އެދޭނަމަ އެފައިސާ އަނބުރައި ހޯދުމުގެ ފުރުޞަތު އޮންނާނެއެވެ. އެހެންވެ އެ ކޯޕަރޭޝަނުގައި އެފައިސާ ބެހެއްޓިފައި ހުރިކަމުގައި ވީނަމަވެސް، ފައިސާގެ ޙަޤީޤީ ވެރިފަރާތަކީ ތިބާއެވެ. އެފައިސާއިން ޒަކާތް ދެއްކުން ވާޖިބުވަނީ ތިބާ އަށެވެ. ޙައްޖު ކޯޕަރޭޝަނުން ތިބާއަށް ޙައްޖަށް ދިއުމަށް ކޯޓާ ހަމަ ޖެހިއްޖެކަން އަންގައި، ޓިކެޓު ގަތުން ފަދަ މުޢާމަލާތެއް އެފައިސާއިން ހިންގައިފި ނަމަ، ތިބާގެ ކިބައި އެފައިސާއިން ޒަކާތް ދެއްކުމުގެ ވާޖިބު ކެނޑިގެން ދާނެއެވެ.