އެމްޓީސީސީގެ މުވައްޒަފުން ޒަކާތަށް ހޭލުންތެރިކުރުމުގެ ޕްރޮގްރާމެއް ކުރިއަށް ގެންގޮސްފި

ޒަކާތަށް ސަރުކާރު މުވައްޒަފުން އަދި ސަރުކާރު ހިއްސާވާ ކުންފުނިތަކުގެ މުވައްޒަފުން ހޭލުންތެރިކުރުމަށް ދިވެހިރާއްޖޭގެ ޒަކާތު ހައުސްއިން ކުރިއަށް ގެންދާ ޕްރޮގުރާމުތަކުގެ ތެރެއިން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީގެ މުވައްޒަފުންނަށް ޒަކާތަށް ހޭލުންތެރިކުރުމުގެ ޕްރޮގުރާމެއް ކުރިއަށް ގެންގޮސްފިއެވެ.
މި ސެޝަންގައި އެކުންފުނީގެ އިސް މުވައްޒަފުންގެ އިތުރުން އެކި ޑިޕާޓްމަންޓްގެ މުވައްޒަފުންވަނީ ބައިވެރިވެފައެވެ. ޒަކާތާއި ގުޅޭ މި ސެޝަންތައް ނަންގަވައިދެއްވީ ޒަކާތު ހައުސްގެ ޑިރެކްޓަރ ޖެނެރަލް، އައްޝައިޚް ޢިއްޒައްދީން އަދުނާން، ޢަބްދުﷲ ޢަލީ، އައްޝައިޚް މުޙައްމަދު ނައުޝީރު އަދި އައްޝައިޚް މޫސާ މުޢިއްޒުއެވެ. މި ސެޝަންގައި ދިވެހިރާއްޖޭގެ ޒަކާތުގެ ނިޒާމް އަދި ޒަކާތުގެ ޙުކުމްތަށް އަލިއަޅުވާލައްވާފައިވެއެވެ.
ދިވެހިރާއްޖޭގެ ޒަކާތު ހައުސް އުފެދިގެން އައި ހިސާބުން ޒަކާތަށް އާންމުންނާއި، ސްކޫލް އަދި ޔުނިވަރސިޓީ ތަކުގެ ދަރިވަރުން ހޭލުންތެރިކުރުމުގެ ގޮތުން ސެޝަންތައް ދަނީ ނަގައިދެމުންނެވެ. އެގޮތުން އަތޮޅުތެރެއާއި މާލޭގެ ސްކޫލްތަކާއި އިސްރައްވެހިންނަށް ޚާއްޞަ ސެޝަންތަކެއްވެސް ޒަކާތު ހައުސްގެ ފަރާތުން ވަނީ ކުރިއަށްގެންގޮސްފައެވެ.