ދިވެހި ރައްޔިތުން ޒަކާތަށް ހޭލުންތެރިކުރުމަށް ދިވެހިރާއްޖޭ ޒަކާތު ހައުސްއިން ކުރިއަށް ގެންދާ ޕްރޮގުރާމު ގދ. އަތޮޅުގެ އެކި ރަށްތަކުގައި ކުރިއަށް ގެންގޮސްފިއެވެ.
ޒަކާތު ހައުސްގެ ޕްރޮގުރާމުތައް ގދ. އަތޮޅުގައި ކުރިއަށް ގެންގޮސްފައިވަނީ ގދ. ތިނަދޫ، ގދ. ވާދޫ، ގދ. ފަރެސްމާތޮޑާ، ގދ. ފިޔޮރީ، ގދ. ރަތަފަންދޫ އަދި ގދ. ނަޑެއްލާގައެވެ. މިހުރިހާ ރަށެއްގައިވެސް ޒަކާތަށް ހޭލުންތެރިކުރުމަށް ގިނަ ހަރަކާތްތަކެއް ޒަކާތު ހައުސްގެ ޓީމުންވަނީ ކުރިއަށް ގެންގޮސްފައެވެ.
އެގޮތުން ދީނީ ދަރުސްތަކާއި، ސްކޫލް ދަރިވަރުން ޒަކާތަށް ހޭލުންތެރިކުރުމުގެ ސެޝަންތަކާއި މުއައްސަސާތަކުގެ މުވައްޒަފުންނާއި އާއްމުން އަދި ވިޔަފާރިވެރިން ޒަކާތަށް ހޭލުންތެރިކުރުމަށްވެސް ސެޝަންތައް ކުރިއަށް ގެންގޮސްފައިވެއެވެ.
މި ދަތުރުގައި މިސްކިތު ދަރުސްތަކާއި ސެޝަންތައް ނަންގަވައިދެއްވުމުގައި ހަރަކާތްތެރިވެލެއްވީ ޒަކާތު ހައުސްގެ ޑިރެކްޓަރ ޖެނެރަލް ފަޟީލަތުއްޝައިޚް ޢިއްޒުދީން އަދުނާންގެ އިތުރުން ޕޮލިޓިކަލް ޑިރެކްޓަރ މުޙައްމަދު ނައުޝީރުގެ އިތުރުން އިސްލާމީ ކަންތައްތަކާ ބެހޭ ވުޒާރާގެ ވާއިޡް އައްޝައިޚް އާޒިމް ޚާލިދުއެވެ.
ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒު، ޒަކާތުގެ ކަންކަން ހަރުދަނާކޮށް ކުރިއަށް ގެންދިއުމަށް ވަކި އިދާރާއެއްގެ ގޮތުގައި ދިވެހިރާއްޖޭގެ ޒަކާތު ހައުސް އުފެއްދެވި ފަހުން ޒަކާތުގެ ކަންކަމަށް އާއްމުން ހޭލުންތެރިކުރުމަށް ޒަކާތު ހައުސްއިން އަންނަނީ ގިނަ މަސައްކަތްތަކެއް ކުރަމުންނެވެ. ނަތީޖާއެއްގެ ގޮތުގައި ފާއިތުވެދިޔަ 2024 ވަނަ އަހަރަކީ ފުރަތަމަ ފަހަރަށް މުދަލު ޒަކާތުގެ ގޮތުގައި 100 މިލިއަނަށްވުރެ ގިނަ ރުފިޔާ ލިބިގެންދިޔަ އަހަރުކަން ފާހަގަކޮށްލެވެއެވެ.
