ޓެކުހަކީ ޒަކާތުގެ ބަދަލެއް ނޫނެވެ. ޒަކާތުގެ ސަބަބުން އިޤްތިޞާދަށާއި މުޖުތަމަޢަށް ލިބޭ މަންފާ ޓެކުހަކުން ނުލިބެއެވެ. ޒަކާތް ދެއްކުމަކީ މާލީގޮތުން ކުރެވޭ އަޅުކަމެއްގެ ގޮތުގައި މާތްﷲ ވާޖިބު ކުރައްވާފައިވާ ކަމެކެވެ. ޒަކާތަކީ އެނެގޭ މިންވަރާއި ހޭދަ ކުރެވޭ މިންވަރުގެ ދާއިރާ ކަނޑައެޅިފައިވާ، ބެހުމުގައި މުޖުތަމަޢުގެ މުއްސަނދިންނާއި ފަޤީރުންގެ މެދުގައި ތަވާޒުނު ހިފަހައްޓާ އިލާހީ ނިޒާމެކެވެ.
ޓެކުހަށް ބަލާއިރު، އެއީ މުޖުތަމަޢުގެ އާދަކާދަތަކުން އުފެދިގެން އައިސްފައިވާ އަދި އިންސާނުން އަމިއްލައަށް ހަދައި ޤާނޫނަކުން ލާޒިމު ކޮށްފައިވާ ނިޒާމެކެވެ. ޓެކްސް ދެއްކުން ޤާނޫނަކުން ލާޒިމު ކޮށްފައިވަނީ ދައުލަތުގެ ބަޖެޓަށް ފައިސާ ހޯދުމަށާއި ދައުލަތުން އަލަށް ހިންގާ މަޝްރޫޢުތަކަށް ފައިސާ ހޯދުން ފަދަ މަޤުޞަދުގައި އެވެ. އޭގެ އިތުރަށް ޓެކުހަކީ އެދައްކާ މީހުންނާއި ދައްކަން ޖެހޭ މިންވަރާއި ހޭދަ ކުރުމުގައި ވެސް ޒަކާތާއި ވަރަށް ތަފާތު އެއްޗެކެވެ.
މިހުރިހާ ކަމަކަށްބަލާއިރު، ޓެކްސް ދެއްކި ކަމުގައި ވީނަމަވެސް އެމީހެއްގެ ކިބައިން ޒަކާތް ދެއްކުމުގެ ވާޖިބު ކެނޑިގެން ނުދެއެވެ. ނުވަތަ ޓެކްސް ދެއްކުމުން ޒަކާތް ދެއްކުނީ ކަމުގައި ނުބެލެވޭތީ، ޓެކްސް ދެއްކިޔަސް އެމީހަކު ޒަކާތް ދައްކަން ޖެހޭނެއެވެ.
